Myanmanın Raxin əyalətində müsəlmanlar və buddistlər arasında baş verən qarşıdurmalar iki tərəfdən də böyük tələfatlara səbəb olub.

ANN.Az-ın xarici mətbuata istinadən verdiyi xəbərə görə, qanlı hadisələr zamanı onlarla insan vəhşicəsinə öldürülüb, minlərlə ev yandırılıb və məhv edilib.

Ən qanlı iğtişaşlar isə keçən ay qeydə alınıb. “Amnesty İnternational”-ın məlumatına görə, son 6 həftədə isə zorakılıqlar ancaq bir tərəfli olub və Rohinyanın müsəlman əhalisini hədəf alıb. Polis və ordunun həyata keçirdiyi basqınlarda yüzlərlə rohinyalı həbs edilib.

Bəzi mənbələrdə isə, ekstremist hindu və buddistlərin müsəlman əhaliyə vəhşicəsinə hücum etdiyi, onların evlərini və özlərini diri-diri yandırdıqları, qadın və qızları zorladıqları bildirilir. İyun ayının 28-dən bəri Raxin əyalətindəki qarşıdurmalarda 650-ə yaxın müsəlmanın qətlə yetirildiyi bildirilir. Eyni zamanda 1200 müsəlman itkin düşüb, 80 mini isə öz evlərindən didərgin düşüb.

BMT Rohinya müsəlmanlarının dünyada ən çox təqibə məruz qalan icmalardan biri olduğunu bildirib. Onlar təhsil və iş kimi ən təməl hüquqlardan məhrum ediliblər. Myanma hökuməti rohinyaları tanımaqdan imtina edir və onları qeyri-qanuni immiqrantlar adlandırır.

Yenilənib: Noyabr 30, -0001