ETİRAF

oie_ywYs0L4wbPAX

Özüntək qəlbin də gözəldir, gülüm,
Əcəb yaradıbdır yaradan səni!
Yadımdan çıxmırsan, bu fani dünya,
Çıxartı qarşıma haradan səni?!

Mən bilməzdim dəyişərəm bu qədər,
Mən bilməzdim daş ürəklər əriyər!
Ayaqları sındırılmış məhəbbət,
Bir gün yenə ayaq açar, yeriyər!

O baxış ki, ilk sevginin iziymiş,
Heç yadımdan çıxmadı ki, neyləyim?!
Mən çox dedim ötəridir, keçəcək,
Ürək sözə baxmadı ki, neyləyim?!

Yoxluğun şam kimi əritdi məni,
Keçdin xəyalımdan pərvanələrtək!
Nə olar, yaxın gəl, tut əllərimdən,
Dayanma uzaqda biganələrtək!

Səni əzizlərəm baxışlarımda,
Çəkmərəm gözümü gözündən bir an!
Öl desən, ölərəm, qal desən, qallam,
İnan ki, çıxmaram sözündən bir an!

Tutsam əllərindən ağlarcasına,
Versəm ürəyimi məndən alarsan?!
Desəm, gəl yanıma! Sevirəm səni…
Unudub hər şeyi, mənim olarsan?!

26 yanvar,2011,Bakı
Şahin İlqar

 

Şahin İlqar

Şahin Sahibzadə İlqar oğlu. 12.03.1991-ci il təvəllüdlü. Azərbaycan Dövlət Mədəniyyət və İncəsənət universtetinin Rejissor Sənəti fakultəsini bitirmişdir. Şair-yazıçı və senaristdir. Yaradıcılığa orta məktəb illərində başlamış, ədəbi növün lirik və epik növlərində qələmini sınamıştır. Yaradıcılığının əsas hissəsini sevgi lirikası təşkil edir. Türk, Fransız, Ərəb və Fars dillərini bilir.

Şərhlər:

  1. Hilary Duff dedi ki:

    Heqiqetende gozel weirdi. Tewekkur

  2. admin dedi ki:

    Beyendim seirini